Hemm fis-seħħ diversi miżuri ta’ sigurtà għall-passiġġieri kollha li jivvjaġġaw minn Malta għal pajjiż ieħor. Dawn il-miżuri ta’ sigurtà jinkludu oġġetti pprojbiti li ma jistgħux jinġarru fil-bagalji tal-idejn jew jittieħdu ġewwa s-sala tat-tluq tal-ajruport, kif ukoll oġġetti pprojbiti li ma jistgħux jiġu ppakkjati fil-bagalji li inti ser tiċċekkja.

 

Għalkemm il-linja tal-ajru tiegħek tinfurmak liema oġġetti ma jistgħux jinġarru fiż-żewġ każijiet, din li ġejja hija lista ta’ oġġetti pprojbiti li tapplika għall-passiġġieri li jitilqu minn Malta.

Mingħajr preġudizzju għar-regoli tas-sikurezza applikabbli, il-passiġġieri m’għandhomx permess iġorru l-oġġetti li ġejjin fiż-żoni ristretti ta’ sigurtà u abbord inġenju tal-ajru:

 

(a) armi tan-nar u kwalunkwe apparat ieħor li jispara l-projettili —

apparat li jista’, jew li jidher li jista’ jintuża sabiex jikkawża ġrieħi serji billi jispara projettili, inklużi:

– armi tan-nar ta’ kull tip, bħalma huma l-pistoli, ir-revolvers, l-azzarini, is-snieter,

– armi tan-nar tal-logħob, kopji u imitazzjonijiet tal-armi tan-nar li dak li jkun jista’ jaħsibhom armi ta’ vera,

– partijiet komponenti ta’ armi tan-nar, esklużi l-miri teleskopiċi,

– armi tal-arja u tas-CO2 kkumpressati, bħalma huma pistoli, armi li jisparaw il-pritkuni, azzarini u armi li jisparaw il-ball bearings,

– pistoli tas-suffarelli tas-sinjali u pistoli tat-tlielaq,

– qwies, “cross bows” u vleġeġ,

– apparat li jispara l-ħarpuni jew il-froxxni,

– wdab u żbandoli;

 

(b) apparat li jistordi —

apparat maħsub speċifikament biex jistordi jew jimmobilizza, inklużi:

– apparat li jixxokkja, bħalma huma l-pistoli li jistordu, tasers u lembubi li jistordu,

– apparat li jistordi l-annimali u li joqtol l-annimali,

– kimiċi, gassijiet u sprejs li jrendu inkapaċi, bħalma huma l-mace, l-isprejs tal-bżar, l-isprejs tal-bżar aħdar, il-gass tad-dmugħ, sprejs tal-aċidu u sprejs li jgerrxu l-annimali;

 

(ċ) oġġetti b’ponta taqta’ jew xifer jaqta —

oġġetti b’ponta taqta’ jew xifer jaqta’ li jistgħu jintużaw sabiex jikkawżaw ġrieħi serji, inklużi:

– oġġetti għat-tqattigħ, bħall-imnanar, mannaretti u skieken tal-biċċiera,

– fisien u baqquni tas-silġ,

– xfafar tal-leħja,

– xfafar tal-kartun,

– skieken bi xfafar ta’ aktar minn 6 cm,

– mqassijiet bi xfafar ta’ aktar minn 6 cm mill-fulkru,

– tagħmir tal-arti marzjali bil-ponta taqta’ jew b’xifer jaqta’,

– xwabel;

 

(d) għodod tal-ħaddiema —

għodod li jistgħu jintużaw jew biex jikkawżaw ġrieħi serji jew inkella biex jheddu s-sikurezza tal-inġenju tal-ajru, inklużi:

– lievi,

– drillers u trapani, inklużi d-drillers portabbli mingħajr wajer,

– għodod bi xfafar jew xaftijiet ta’ aktar minn 6 ċm li jistgħu jintużaw bħala armi, bħalma huma t-turnaviti u lfurmaturi,

– srieraq, inklużi s-srieraq portabbli mingħajr wajer,

– torċi tal-ħruq,

– apparat li jispara l-boltijiet u l-imsiemer;

 

(e) strumenti spuntati —

oġġetti li jistgħu jintużaw biex jikkawżaw ġrieħi serji mad-daqqa, inklużi:

– mazez tal-baseball u tas-softball,

– mazez u lembubi, bħall-billy clubs, blackjacks u lembubi tal-għassa,

– tagħmir tal-arti marzjali;

 

(f) splussivi u sustanzi u apparat inċendjarji/u —

splussivi u sustanzi u apparat inċendjarji/u li jistgħu, jew jidhru li jistgħu, jintużaw biex jikkawżaw ġrieħi serji jew biex jheddu s-sikurezza tal-inġenju tal-ajru, inklużi:

– munizzjon,

– mezzi detonaturi,

– detonaturi u miċeċ,

– tagħmir splussiv ta’ imitazzjoni,

– mini, granadi u oġġetti splussivi militari oħra,

– logħob tan-nar u pirotekniki oħra,

– bombi tad-duħħan u stoċċijiet li jiġġeneraw id-dħaħen,

– dinamite, porvli u splussivi plastiċi.

 

Il-passiġġieri m’għandhomx il-permess iġorru l-oġġetti li ġejjin fil-bagalji tal-istiva tagħhom:

splussivi u sustanzi u apparat inċendjarji/u —

splussivi u sustanzi u apparat inċendjarji/u li jistgħu jintużaw biex jikkawżaw ġrieħi serji jew biex jheddu s-sikurezza tal-inġenju tal-ajru, inklużi:

– munizzjon,

– mezzi detonaturi,

– detonaturi u miċeċ,

– mini, granadi u oġġetti splussivi militari oħra,

– logħob tan-nar u pirotekniki oħra,

– bombi tad-duħħan u stoċċijiet li jiġġeneraw id-dħaħen,

– dinamite, porvli u splussivi plastiċi.